Instituti Italian i Kulturës në Tiranë ka kënaqësinë të bashkëpunojë në edicionin XXII të TIFF (Tirana International Film Festival 23-26 Shtator) duke mbështetur aktivitetin kushtuar kremtimit të njëqindvjetorit të një prej figurave më ikonike në historinë e kinemasë: Marcello Mastroianni, i lindur më 28 shtator 1924.
– 23.09.2024 në Kinema Millennium: La Dolce Vita i Federico Fellini
– 24.09.2024 në Kinema Millennium: 8½ i Federico Fellini
– 25.09.2024 në Qendrën e Artit Agimi: Io, Io, Io… e gli Altri i Alessandro Blasetti
– 26.09.2024 në Qendrën e Artit Agimi: Che Ora È i Ettore Scola
Marcello Mastroianni (1924-1996) ka qenë një nga aktorët më të mëdhenj të kinematografisë italiane dhe ndërkombëtare, duke lënë gjurmë të pashlyeshme në botën e kinemasë. I lindur në Fontana Liri, Lazio, Mastroianni iu afrua botës së artit në vitet ‘50, duke fituar menjëherë reputacion, falë karizmës së tij në skenë. Takimi me Federico Fellini-n qe vendimtar për karrierën e tij, duke e shtyrë të luajë në kryeveprat si *La Dolce Vita* (1960) dhe *8½* (1963), filma që janë kthyer në pikë referimi në kinematografinë botërore. Shkathtësia e tij e jashtëzakonshme e lejoi të kalonte me lehtësi nga rolet dramatike në ato komike, duke treguar një mjeshtëri të rrallë.
Mastroianni bashkëpunoi me shumë regjisorë të shquar, duke përfshirë Michelangelo Antonioni-n dhe Bernardo Bertolucci-n, si dhe u nderuar me disa çmime, duke përfshirë pesë David di Donatello dhe dy nominime për Oscar. Karriera e tij u shtri edhe në teatër dhe televizion, duke konfirmuar talentin dhe aftësinë e rrallë përshtatëse. Me gjithë suksesin e madh, Mastroianni mbeti gjithmonë një figurë modeste dhe e rezervuar, shumë e respektuar në fushën e tij. Ndarja e tij nga jeta në vitin 1996 shënoi fundin e një epoke të artë për kinemanë italiane, por vepra e tij vazhdon të frymëzojë dhe të ndikojë brezat e ardhshëm, duke e kthyer në një legjendë të përjetshme.
Biografia (centrostudimarcellomastroianni.it)
TIRANA INTERNATIONAL FILM FESTIVAL është një festival ndërkombëtar i filmit, i krijuar në vitin 2003, i cili synon të krijojë në Shqipëri, por edhe në rajon, një qendër kulturore të kinemasë alternative dhe të pavarur.
Programi ditor i TIFF përfshin më shumë se 200 premiera filmash artistikë dhe me metrazh të shkurtër, të të gjitha formateve dhe zhanreve: fiction, dokumentar, animacion, eksperimental dhe video art. I hapur për çdo kineast nga e gjithë bota, TIFF prezanton vepra të reja kinematografike nga regjisorë të njohur me reputacion ndërkombëtar, si dhe filma nga studentë të talentuar dhe artistë të rinj.
Konsulto programin: TIFF – TIFF – Tirana Film Fest