Instituti Italian i Kulturës ka kënaqësinë të prezantojë takimin e dymbëdhjetë dhe të parafundit të ciklit Annotazione Video kushtuar MABEDO, që sjellin një përzgjedhje prej tre videosh të titulluar “Fragile”.
Përshkrim i shkurtër i videos
Paul Ricoeur pohon se identiteti ynë nuk është diçka e dhënë a priori që mbetet e pandryshuar brenda nesh; përkundrazi, identiteti ynë ndërtohet përmes një procesi në zhvillim të vazhdueshëm, konkretisht përmes narrativës. Në këtë kuptim, “identiteti narrativ” lind nga mënyra se si ngjarjet e jetës sonë i bëjmë pjesë të narrativës (mimesis). Ajo që jemi është një proces dinamik ndërmjetësimi me “tjetrin” dhe me kohën. Një gjë e tillë e ekspozon identitetin tonë ndaj brishtësisë, sepse i nënshtrohet një ndërmjetësimi të vazhdueshëm midis kohës së fragmentuar dhe në ndryshim të jetës sonë; dhe tjetrit, i cili, duke u bërë pjesë qendrore e narrativës tonë, ripërcakton vazhdimisht se kush jemi, pikërisht sepse nuk jemi identitete të vetëmjaftueshme.
Megjithatë, perspektiva e Ricoeur nuk duhet interpretuar negativisht. Ai argumenton se brishtësia është një kusht përbërës i qenies sonë të lirë dhe krijuese, pikërisht në sajë të aftësisë së saj për të rishkruar, riinterpretuar dhe transformuar vazhdimisht veten. Me fjalë të tjera, ai sheh në të qenit i brishtë kushtin e nevojshëm për të rikrijuar vazhdimisht vetveten.
Fragile (I brishtë) është gjithashtu titulli i eventit kushtuar MASBEDO-s, gjatë së cilës do të shfaqen tre vepra video, të përzgjedhura pikërisht sepse secila syresh vë në pikëpyetje idenë e një natyre të pandryeshueshme të qenies sonë, duke krijuar kështu çarje në siguritë tona dhe duke na dhënë mundësinë ta rimendojmë identitetin tonë personal dhe kolektiv përmes historive që shkruajmë në jetën tonë.
Annotazioni Video
Koncepti i shënimeve lidhet me mbajtjen shënim, kapjen e një elementi mbi të cilin duam të reflektojmë apo të ruajmë në kujtesë. Ai ka të bëjë me çfarë na bën më fort përshtypje në fluksin e informacionit mes të cilit gjendemi, pra flet për ne, përcakton vendin tonë lidhur me atë që kemi përballë. Annotazioni Video është një projekt i Institutit Italian të Kulturës, në bashkëpunim me Bashkinë e Tiranës, i kuruar nga Stefano Romano, i cili në harkun e tre viteve synon të reflektojë mbi dinamikat e zhvilluara në kërkimet e disa prej protagonistëve të artit bashkëkohor italian e shqiptar, që kanë si fill bashkues videon.
Bio MASBEDO
MASBEDO është një dyshe artistësh e përbërë nga Nicolò Massazza (1973) dhe Iacopo Bedogni (1970). Ata punojnë së bashku që prej vitit 1999 dhe aktualisht jetojnë në Milano dhe Piacenza. Karakteristikë e vazhdueshme e punës së tyre është eksplorimi dhe shkrirja e gjuhëve të ndryshme artistike: video, instalacion, kinema, performancë, teatër avangardë dhe dizajn zanor. Veprat e tyre karakterizohen nga një komponent i fortë gjithëpërfshirës dhe site specific. Qasja performuese ndaj krijimit të veprave është e dallueshme në gjithçka çfarë kanë realizuar, duke u prirur ndaj rrëfimeve emocionale e depërtuese që gërmojnë thellë në marrëdhëniet njerëzore dhe subjektivitetin kompleks të individit bashkëkohor. Kohët e fundit, kanë identifikuar marrëdhënien mes kinemasë dhe artit si një fushë të preferuar hulumtimi, të cilës i qasen me një sy të vëmendshëm, si përsa i përket elementëve socio-antropologjikë, ashtu edhe atyre më intimë dhe poetikë.
Veprat e tyre janë ekspozuar në muze, bienale dhe institucione ndërkombëtare dhe prodhimet e tyre artistike janë programuar pranë teatro operash, auditore dhe qendra të rëndësishme të eksperimentimit artistik, duke përfshirë: Museo del Novecento në Milano, Fundació Antoni Tàpies Barcelona, Teatrino Palazzo Grassi Qendra e Artit në Venecia, Luigi Pelloitem. Arti Bashkëkohor Torino, Platforma e Filmit Sharjah, Lo schermo dell’arte Firence, CPH:- DOX Kopenhagen, MAXXI Romë, GMAeC Bergamo, Fondazione ICA Milan, Muzeu i Artit Multimedial MAMM Moskë, Manifesta12 Palermo, Kunstlaboratorium Na Vestfossen Festivali i Santa Fossen Oslo, Romaeuro Pompidou/Forum des Immages Paris, MARTa Herford, Reggia di Venaria Reale Torino, Muzeu i Artit Bashkëkohor Zagreb, Fondacioni Nomas Romë, Museu Nacional d’Art de Catalunya Barcelona, MART Rovereto, Muzeu i Artit në Tel Aviv, Fondazione Arena di Verona, Art Qendra e Arteve Basel Film Hong Kong, Festivali Ndërkombëtar Santarcangelo i Teatro in Piazza, Fondazione Merz, Festivali i Filmit në Venecia – Dita e Autorëve, Muzeu Leopold në Vjenë, Piccolo Teatro Strehler Milano, Art Unlimited Basel, OK Offenes Kulturhaus Linz, Tanzhaus Dusseldorf, Qendra e Artit Ujazdowsky Castle Varshavë, Roma-europa Festival- Centrale Fies, MACRO Roma, Muzeu Kombëtar Centro de Arte Reina Sofía Madrid, 53. Ekspozita Ndërkombëtare e Artit Bienalja e Venecias, CCCB Qendra e Kulturës Bashkëkohore Barcelonë, Locarno International Film Festival.