Instituti Italian i Kulturës, në bashkëpunim me Almanart.al, ka kënaqësinë të prezantojë performancën me poezi dhe muzikë të frymëzuar nga Dante, “Nën Velin e kontrabasit“, me pjesëmarrjen e kontrabasistes Caterina Palazzi dhe aktores shqiptare Anila Balla.
Një udhëtim përmes fantazisë, muzikës dhe teatrit, Nën Velin e kontrabasit – Poezi dhe muzikë e frymëzuar nga Dante, është një shkrirje mes muzikës eksperimentale, poezisë dhe performancës së cirkut.
Dy artiste të ndryshme do të takohen në skenë: Caterina Palazzi, kontrabasiste e njohur italiane që eksploron dhe krijon dimensione të reja muzikore, dhe Anila Balla, aktore shqiptare, e cila ndërton një rrëfim teatral, i cili eksploron simbolikën e veprës së Dantes, duke ndërthurur tekstin dhe veprimin skenik.
Artistë nga Cirku Kombëtar do të dhurojnë një dimension të fuqishëm vizual, me performanca të ndërthurura me një skenografi poetike. Publiku do të ftohet të veshë maska, duke u bërë pjesë integrale e instalacionit vibrues të mbrëmjes, duke thelluar përvojën gjithëpërfshirëse dhe ritualiste të eventit.
Caterina Palazzi është kontrabasiste me origjinë romane, udhëheqëse dhe kompozitore e grupit italian të muzikës jazz, noise dhe rock psikedelik Sudoku Killer. Ajo studioi në Kolegjin e Muzikës Saint Louis në Romë. Në vitin 2010, fitoi Jazz Award, për Kompozitoren më të Mirë Italiane të Xhazit. Ajo u nderua midis talenteve të reja më të mira në Top Jazz 2015, dhe në vitin 2022, revista Rockit e përfshiu mes njëzet basistëve më të mirë italianë të të gjitha kohërave. Ka qenë kitariste e grupit punk rock Barbie Killers. Me grupni Sudoku Killer, publikoi albumet “Sudoku Killer” (2010), “Infanticide” (2015) dhe “Asperger” (2018). Ka bashkëpunuar me Stefano Bollani, Gianluca Petrella, Roberto Gatto, Maurizio Giammarco, Mirko Guerrini, Israel Varela dhe Luca Aquino. Në vitin 2023, ajo hapi turneun italian për Kim Gordon (basiste për grupin amerikan të rokut Sonic Youth).
Anila Balla është regjisore teatri, aktore dhe producente filmash, e njohur për qasjen e saj artistike të angazhuar, që eksploron lirinë, shtypjen dhe identitetin përmes performancës dhe filmit. Ajo është anëtare e Akademisë Evropiane të Filmit që nga viti 2022. Filmi i saj i parë me metrazh të shkurtër, The News, fitoi çmimin për Filmin më të Mirë me metrazh të shkurtër në Flickerfest Sydney dhe u nominua për EFA, duke e vendosur atë si një nga zërat më origjinalë në artin bashkëkohor shqiptar.
“Almanart.al“ është një hapësirë kulturore kushtuar artit dhe kulturës në Shqipëri, ku mund të gjeni kalendarin artistik ditor për qytetet në Shqipëri, Kosovë dhe rajonet shqipfolëse.
23.01.2026 ora 19:00
Salla e Qendrës Kulturore të Katedrales Ortodokse, Tiranë
Biletat së shpejti në dispozicion në almanart.al