Instituti Italian i Kulturës është i kënaqur të bashkëpunojë me Bibliotekën Kombëtare të Shqipërisë për ekspozitën e dedikuar botimeve historike të Bibëlve:
Koleksioni i Biblave – Thesaret e Bibliotekës Kombëtare të Shqipërisë
Biblioteka Kombëtare e Shqipërisë
19.11 – 05.12.2025
Çdo ditë ora: 08:00 – 20:00
Inaugurazione: 19.11.2025 ore 17:00
Në vazhdën e ekspozitave të organizuara nga Biblioteka Kombëtare kohët e fundit për t’i bërë të njohur publikut thesaret pak të njohura që gjenden në fondet e saj, ekspozita “Koleksioni i Biblave” zë padyshim një vend krejt të veçantë.
Kjo ekspozitë i sjell publikut një pasuri të trashëguar ndër shekuj që do t’i bënte nder çdo biblioteke, e cila deri më sot ka mbetur pak e njohur. Bëhet fjalë për një numër mjaft të madh Biblash, disa syresh mjaft të rralla, të shtypura në Itali, Francë, Gjermani, Hollandë, Greqi etj gjatë një periudhe që shkon nga mesi i shekullit XV deri në atë të XIX. Krahas tyre jo pak dorëshkrime që përmbajnë po ashtu pjesë nga Shkrimet e Shenjta.
Pjesa e dytë e ekspozitës i kushtohet historikut të përkthimit të Shkrimeve të Shenjta në shqip. Ajo nis me librat e Buzukut, Bogdanit dhe Budit, dëshmitë e para të shqipes së shkruar, në të cilat gjen të përkthyera në shqip pjesë nga Bibla.
Më tej vazhdohet me përpjekjet e dekadave të para të shekullit të XIX për ta sjellë Biblën në shqip falë punës së madhe të bërë nga Shoqëria Biblike Angleze, nëpërmjet një sërë figurash të shquara të emancipimit tonë kombëtar, si Vangjel Meksi, Konstandin Kristoforidhi, Gjerasim Qiriazi, për të vazhduar më tej në kohë me Fan Nolin, apo përkthime si ai i Dom Simon Filipajt etj.